Mitovy lenta! Nandritra ny tafa manokan’ireo birao nasionalin’ny KMF/CNOE-Fanabeazana olompirenena ny alatsinainy, 25 Novambra teo no nanambaran’izy ireo fa takian’ny fikambanana hatrany ny fitovian-jo tanterahin’ny mpikirakira fifidianana sy ny Fitondram-panjakana izay mijoro amin’ireo kandida ho Ben’ny tanana sy Mpanolontsaina kaominaly na monisipaly, amin’izao fampielezankevitra sy fiatrehana ny fifidianana izao. «Ny Fanjakana Malagasy natao ho an’ny Malagasy rehetra fa tsy ho an’olon-tokana na antoko na vondron’antoko. » Hoy ny Filoha Nasionaly, Robert Namearison, nandritran’ny tafa manokana tamin’ireo mpanao gazety tonga naka ny angom-baovao, tao amin’ny foiben’ny KMF/CNOE-Fanabeazana olompirenena, teny Antanimena. Mitovy zo ny kandida fa ny olompirenena mpifidy no manam-pahefana hisafidy izay hitondra azy ireo amin’ny andron’ny latsa-bato.
Nanisy tsindrim-peo hatrany ity lehiben’ny Fikambanana ity, notronin’ireo Filoha lefitra roa, Félix Rabekijana sy Arcelio Avisoa, tamin’io fiandohan’ny herinandro io, fa anaty vanim-potoanan’ny fampielezan-kevitra izao ka « Aoka ny hevitra tokoa no aely; ny vina, ny programan’asan’ny kandida no avoitra fa tsy ny fifanenjehana. »Araka ny filazan’i Robert Namearison, Filohan’ny KMF/CNOE-Fanabeazana olompirenena. Irarian’ny fikambanana hatrany ny hisian’ny fitoniana amin’izao zotram-pifidianana izao.
Lisitra
Notsiahivin’ireo lohandohan’ny mpisorona amin’ny fikambanana fa mampiavaka ity zotram-pifidianana ity ny fifidianana amin’ny alalan’ny lisitra. Ny tsikaritra anefa, ny loha-lisitra izay ho Ben’ny tanana hatrany no arangaranga fa takona avokoa ireo ho Mpanolontsaina ao anaty lisitra. Raha ny famakafakan’ny fikambanana, mihevitra izy ireo fa hampilamina ny fampandrosoan’ny Ben’ny tanana izay ho voafidy eo ny ho fananany maro an’isa amin’ireo Filankevitry ny Kaominina, amin’ny alalan’izao fomba fifidianana amin’ny lisitra izao. Aoka anefa ho firaisankina hanasoavana ny olompirenena izany fa tsy ho firaisanana tsikombakomba hamotehana ny soa iombonana ho tombotsoan’olombitsy.
Etsy andaniny, nampalaza ny fanomanana ity fifidianana ity ny andininy faha- 42 ao amin’ny Lalana izay nanome vahana ny resaka «ordonnance ». Nohamafisin’ny Filohan’ny KMF/CNOE-Fanabeazana olompirenena fa tsy izay rehetra vao feno 18 taona no afaka mahazo izany fa izay efa nitady ny fomba hidirana tao anaty lisitry ny mpifidy kanefa latsaka. Hetahetan’ny fikambanana ny fitokanan’ireo vao tafiditra anaty lisi-pifidianana tamin’ny alalan’izao « ordonnance izao » ka hiarahana mamarana izany, ary iarahana manasonia raha ilaina ; ka hiavaka amin’ny lisitra efa nofaranana teo aloha.
Ny fikambanana KMF/CNOE-Fanabeazana olompirenena dia manao antso avo hatrany ny olompirenena handeha hifidy, ny 11 Desambra ho avy izao, ary “aoka ny tena safidin’ny vahoaka maro an’isa no ho mpandresy”. Hisorohana ny fifampiangan’ny kandida ny halabato, entanina ireo mpirotsaka ho fidiana handrakotra delege ny birao fandatsaham-bato rehetra ary hanara-maso ny zotra sy ny vokatra. Handray ny andraikiny amin’ny maha-mpanara-maso ny fifidianana azy ihany koa ireo ratsamangaikan’ny KMF/CNOE-Fanabeazana olompirenena manerana ny Nosy.
